පාස්කු ඉරිදා දේවස්ථාන හා හෝටල්වලට සහරාන් ඇතුළු පිරිස ස්ථාන අටකදී මරාගෙන මැරෙන ප්‍රහාර එල්ල කිරීමෙන් අනතුරුව දෙවන ප්‍රහාරයක් එල්ල කිරීමට සූදානම්ව සිටි පිරිස හඳුනාගෙන එය වැළැක්වීමට පියවර ගත් කිසිදු ආරක්ෂක අංශ නිලධාරියකුට වසර පහක් ගතවී ඇතත් කිසිදු උසස් වීමක්, ත්‍යාග මුදලක් හෝ ප්‍රශංසාවක් ලබා දී නැති බවට එම නිලධාරීහු මැසිවිලි නඟති.
දෙවන ප්‍රහාරයට සූදානම්ව සිටි සහරාන්ගේ සහෝදරයන් ඇතුළු පිරිස අත්අඩංගුවට ගැනීමට යෑමේදී අම්පාර සයින්දමරුදුහිදී බෝම්බ පුපුරුවාගෙන සියදිවි හානි කරගනු ලැබුවේ ඊයේ (26) වැනි දිනකය.
සයින්දමරුදු සුනාමි ගම්මානයට නිවසක් කුලියට ගෙන පැමිණි පිරිමි තිදෙනකු සම්බන්ධයෙන් ප්‍රදේශවාසීන් ඔවුන්ගේ පදිංචිය පිළිබඳව අකමැත්ත ප්‍රකාශ කිරීමේදී තමන් ඉක්මනින් පිටත්ව යන බව පවසා ඇත. සෑහීමකට පත් නොවූ තරුණ පිරිසක් කාර්තිවු හන්දියේ සිටි පොලිස් හා හමුදා භට පිරිසකට තොරතුරු දන්වා ඔවුන් ඒ වෙත පැමිණීමේදී සැකකරුවෙක් ආරක්ෂක අංශ වෙත වෙඩි තබා තිබිණි. ප්‍රතිප්‍රහාර හමුවේ නිවසේ සිටි පිරිසක් බෝම්බ තුනක් පුපුරවාගෙන තිබුණේ 2019 අප්‍රේල් 26 වැනිදා පස්වරු 6.45ත් 7ත් අතර වේලාවේදීය. සෝදිසි මෙහෙයුම ආරම්භ කර තිබුණේ පසුදා (27) අලුයම 5ට පමණය. යුද හමුදාවේ සහාය සඳහා පොලිස් විශේෂ කාර්ය බළකාය සහ පොලිසිය ද එක්ව තිබිණි. පිරිමින් කාන්තාවන් දරුවන් ඇතුළු මළ සිරුරු 16ක් සමඟ අදාළ ස්ථානයේ තුවාල සහිතව අසාධ්‍ය තත්ත්වයෙන් වැටී සිටි කාන්තාවක හා දැරියක ආරක්ෂක අංශ විසින් මුදාගනු ලැබුවේ එහිදීය.
රක්ෂණ ශ්‍රියන්ත