මධ්යම කඳුකරයට ප්රමාණවත් වැසි නොලැබීම නිසා මස්කෙළිය,මාවුස්සාකැලේ ජලාශයට යටව තිබූ පැරණි මස්කෙළිය නගරයේ සර්ව ආගමික මධ්යස්ථානවල නටබුන් යළි ජලයෙන් මතුවෙමින් පවතින අයුරු මේ දිනවල දක්නට ලැබේ.
ජලාශයේ ජල මට්ටම පෙරේදා (18)පෙ.ව.8.00 වන විට පිටාර මට්ටමේ සිට අඩි 45ක් පහත බැස ඇති බව ජලාශ භාර ඉංජිනේරුවෝ පැවසූහ.
ලක්ෂපාන ජලවිදුලි බලාගාර සංකීර්ණයට අයත් සංවර්ධන ක්රියාවලිය යටතේ මාවුස්සාකැලේ ජලාශයේ ඉදිකිරීම් කටයුතු ආරම්භ කර ඇත්තේ 1961 වසරේදීය. 1968 ඉදිකිරීම් අවසන් කර 1969 වසරේදී ජලය පිරවීම ආරම්භ කර තිබේ. ජලය පිරවීම ආරම්භ කළ අවස්ථාවේ පැවති අධික වර්ෂාවත් සමඟ දින 02ක කාලයකින් සම්පූර්ණයෙන් ජලාශය පිරී ගිය බව පැරැන්නෝ පවසති. පැරණි මස්කෙළිය නගරය සමඟ උප නගර ලෙස පැවති ගඟේවත්ත හා ෆොරස් යන නගර 02 ද මේ ජලාශය ඉදිකිරීමේදී ජලයට යට වී ඇත. අක්කර අඩි 93300ක ජල ධාරිතාවකින් යුත් විදුලිබලය උත්පාදනයට ජලය රැස් කිරීම අරමුණු කරගෙන ඉදිකරන ලද මේ දැවැන්ත ජලාශයේ සම්පූර්ණයෙන් ජලය පිරීම අවසන් වී ඇත්තේ 1969 අගෝස්තු මාසයේදීය.
ජලාශය ඉදිකිරීමේදී පැරණි මස්කෙළිය නගරයේ තිබූ රෝහල, පොලිසිය, සිංහල හා දෙමළ පාසල් 02ක්, බෞද්ධ විහාරස්ථානය, බෝධිය, ශ්රී ෂන්මුගනාදන් හින්දු කෝවිල, ගණ දෙවි කෝවිල, සිව කෝවිල, කතෝලික දේවස්ථානය, මුස්ලිම් පල්ලිය සර්ව ආගමික මධ්යස්ථාන, සිනමා ශාලා, ව්යාපාරික ප්රජාවගේ නිවාස, වෙළෙඳසල්, ඇතුළු සියලු දේපළ, මෙන්ම මස්කෙළිය – සාමිමලේ හා මස්කෙළිය – ශ්රී පාද ප්රධාන මාර්ග පද්ධතිය ජලයෙන් යට වූ දේපළ අතර නෂ්ටාවශේෂ ලෙස තවමත් පවතින බව පැරණි මස්කෙළිය නගරයේ දිවි ගෙවූ, දැනටත් ජීවතුන් අතර සිටින අතළොස්සක් වූ පැරැන්නෝ පවසති.
ඇඩම්ස්පීක්, මෝකා, බැනියන්, බ්රවුන්ලෝ, ලක්ෂපාන, රක්කාඩු, ෆොරස් යන තේ වතු හා එම තේ වතුවල පිහිටි තේ කර්මාන්ත ශාලා, මස්කෙළිය – ශ්රී පාද මාර්ගයේ පිහිටි කාවඩි පාලම, ගල් පාලම මාවුස්සාකැලේ ජලාශයේ ජලය පිරවීමේදී ජලයට යටවුණු දේපළ අතර වේ. පැරණි මස්කෙළිය නගරයේ ව්යාපාරික කටයුතුවල නිරතව සිටි සිංහල, දමිළ, මුස්ලිම් විශාල පිරිසක් මෙන්ම වතු කම්කරු ජනතාවටද තම පාරම්පරික දේපළ මෙහිදී අහිමි විය.
ජල පෝෂක ප්රදේශවලට ප්රමාණවත් වැසි නොලැබීමෙන් මාවුස්සාකැලේ ජලාශයේ ජල මට්ටම ක්රම ක්රමයෙන් පහත බසිද්දී ජලාශයට යටව තිබූ පැරණි මස්කෙළිය නගරයේ සර්ව ආගමික සිද්ධස්ථානවල නෂ්ටාවශේෂ සහ අනෙකුත් දේපළ යළි ජලයෙන් මතුවීමත් සමඟ අතීතාවර්ජනය ප්රදේශවාසීන්ට යළි සිහි ගැන්වීමෙන් සුන්දරත්වය සමඟ දැඩි දුකක්ද ඇතිවන බව ගම්මු පවසති. ජාතික අවශ්යතාවක් වන විදුලිය උත්පාදනයට ඇවැසි ඉදිකිරීම්වලදී තම පාරම්පරික දේපළ අහිමි වූවත් විදුලිය උත්පාදනයට දායකවීමට ලැබීම ගැන වර්තමානයේ තමන්ට විශාල සතුටක් ඇති බවත් ගම්මු කියති.
ජලාශයට යටව තිබූ සර්ව ආගමික මධ්යස්ථාන නැවත ජලයෙන් මතුවීමෙන් අනතුරුව ප්රදේශයේ බෞද්ධ හා හින්දු බැතිමතුන් විහාරස්ථාන සහ කෝවිල්වලට ගොස් පුද පූජා පැවැත්වීම සිදු කරනු ලබයි.
ජාතික ජලවිදුලිබල පද්ධතියට අයත්, ලක්ෂපාන ජල විදුලිබලාගාර සංකීර්ණය යටතේ ඇති කැනියොන්, ලක්ෂපාන, නව ලක්ෂපාන, පොල්පිටිය හා බ්රෝඩ්ලන්ඩ් ජල විදුලිබලාගාර 05 සඳහා ප්රධාන වශයෙන් ජලය සැපයෙන්නේ මාවුස්සාකැලේ ජලාශයෙනි.
සටහන හා ඡායාරූප - මස්කෙළිය සමූහ - ගාමිණී බණ්ඩාර ඉලංගන්තිලක