පාලිත තෙවරප්පෙරුම මහතා ජනතාව අතර සාමාන්‍ය ආකාරයට ජීවත් වූ අයෙක් බවත්, කිසිවිටක මන්ත්‍රී තනතුරෙන් හිස උදුම්මවා නොගත් බවත් හිටපු ජනාධිපති මහින්ද රාජපක්ෂ මහතා දේහයට අවසන් ගෞරව දැක්වීමෙන් අනතුරුව පැවසීය.
හිටපු ජනාධිපති මහින්ද රාජපක්ෂ මහතා ඊයේ(19) දහවල් පාලිත තෙවරප්පෙරුම හිටපු ඇමැතිවරයාගේ දේහයට අවසන් ගෞරව දැක්වීමෙන් අනතුරුව ඒ මහතාගේ බිරිය ඇතුළු පවුලේ සාමාජිකයන් සමඟ සුහද පිළිසඳරක ද නිරත විය.
අවසන් ගෞරව දැක්වීමට පැමිණි ජනතාව ද අදහස් දක්වමින් පැවසුවේ කොරෝනා කාලේ අපි අසරණ වෙලා බඩගින්නේ ඉන්නකොට අපට කන්න දුන්නේ පාලිත මහත්තයා. ඔහු නැති අඩුව අපට දරාගන්න බැහැ.
ගංවතුරක් ආවත් බත් පැකට් එකක් අරගෙන එන්න හිටියේ පාලිත මහත්තයා විතරයි.මීළඟට එන ගංවතුරෙදි අපි බඩගින්නේ තවත් පිරිසක් පැවසූහ.
පසුගියදා (17) රාත්‍රී 10.00ට පමණ හිටපු ඇමැතිවරයාගේ දේහය මතුගම යටදොළවත්ත පිහිටි ඒ මහතාගේ නි‍ෙවසට රැගෙන එනවිටත් විශාල පිරිසක් නි‍ෙවසේ රැස්ව සිටියහ.
ඒ මහතාගේ දේහයට අවසන් ගෞරව දැක්වීමට හිටපු ජනාධිපති මහින්ද රාජපක්ෂ, ෆීල්ඩ් මාර්ෂල් සරත් ෆොන්සේකා, හිටපු කථානායක කරු ජයසූරිය, ඇමැතිවරුන් වන ප්‍රසන්න රණතුංග, අනුප පස්කුවල්, හිටපු ඇමැතිවරුන් වන රෝහිත අබේගුණවර්ධන, රවුෆ් හකීම්, මයන්ත දිසානායක ඇතුළු පක්ෂ විපක්ෂ දේශපාලන නියෝජිතයෝ රැසක් මේ අවස්ථාවට සහභාගි වූහ.
දේහය නි‍ෙවසට රැගෙන පැමිණි මොහොතේ සිට අඛණ්ඩව විශාල පිරිසක් හැඬූ කඳුළින් පැමිණ ශෝකය පළ කරන අයුරු දක්නට ලැබුණි.
හිටපු ඇමැතිවරයාගේ අවසන් කටයුතු කිරීමට නියමිත මතුගම, කරම්පෑතර වගා ඉඩමක ඔහු විසින්ම ඉදිකර ඇති සොහොන් කොත නැරඹීමටද මහ පිරිස් පැමිණි අයුරු ද දැකගත හැකිවිය.
මියයන විට 64 වන වියේ පසු වූ පාලිත තෙවරප්පෙරුම මහතාගේ අවසන් කටයුතු ඊයේ (19) පස්වරුවේ මතුගම කරම්පෑතර ඒ මහතා ඉදිකළ පවුලේ සුසාන භූමියේදී සිදු කෙරිණි.
පොතුපිටිය සුමිත් ප්‍රේමතිලක