අම්පාර පොලිස් බල ප්‍රදේශය තුළ මාස කිහිපයකට පෙර කරන ලද මංකොල්ල කෑම්වලට අවශ්‍ය සැකකරුවන් තිදෙනෙක් අම්පාර මූලස්ථාන පොලිසියේ අපරාධ විමර්ශන අංශයේ නිලධාරීන් විසින් මහත් වෙහෙසක් ගෙන අත්අඩංගුවට ගෙන තිබේ.
2024.01.26 වෙනි දින අම්පාර නගරයේ ගුණසිරි බේකරියේ නිවසට පැන එහි හිමිකරුවන් බිය ගන්වා 565,000ක රත්තරන් බඩු සොරකම් කර ඇති අතර 2024.03.05 වෙනි දින අම්පාර සාම චෛත්‍යය අසල නිවසකට පැන වයසක මවකගේ ගෙල තිබූ රන් මාලය පැහැරගෙන ගොස් තිබේ.
මෙම සොරකම් දෙකම සැලසුම් සහගත ලෙස සිදුකර ඇති අතර පුද්ගලික ඔත්තුකරුවෙකුගෙන් ලද තොරතුරකට අනුව අම්පාර මූලස්ථාන පොලිසියේ අපරාධ විමර්ශන අංශයේ ස්ථානාධිපති උපුල් කුමාරගේ මහතා විසින් මෙම පරීක්ෂණ කටයුතු පිළිබඳව දැඩි අවධානය යොමුකර පරීක්ෂණ පවත්වා ඇති අතර එහිදී අම්පාර ගුණසිරි හෝටලයේ නි‍ෙවසින් පැහැරගත් රත්තරන් වළල්ලක් කඩුවෙල ප්‍රදේශයේ පෞද්ගලික උකස් ආයතනයක උකස් කර තිබියදි සොයා ගෙන තිබේ. මේ පිළිබඳව තවදුරටත් විමර්ශනය කිරීමේදී අම්පාර මූලස්ථාන පොලිසියේ සේවය කර සේවය අහිමිවූ පොලිස් රියැදුරෙකු ලෙස කටයුතු කළ නිලධාරියෙක් මෙම සොරකමේ මහමොළකරු වශයෙන් කටයුතු කර ඇති බවට අපරාධ විමර්ශන අංශයේ නිලධාරින්ට තොරතුරු ලැබුණු අතර පසුව පොලිස් නිලධාරින් විසින් ඔහු අත්අඩංගුවට ගනු ලැබීය.
ඔහුගෙන් කරන ලද ප්‍රශ්න කිරීම්වලදි මෙම සොරකම සම්බන්ධව තවත් සැකරුවන් දෙදෙනෙක් අත්අඩංගුවට ගැනීමට පොලිස් නිලධාරින්ට හැකිව තිබේ. ඉන් එක් සැකකරුවෙක් අම්පාර මිහිඳුපුර ප්‍රද්ශයේ පදිංචිකරුවෙක් වන අතර අනෙක් සැකකරු අම්පාර නාමල්ඔය පදිංචිකරුවෙකි. අත්අඩංගුවට ගත් මෙම සැකකරුවන් ප්‍රශ්න කිරීම්වලදී 2024.03.05 වෙනි දින අම්පාර සාම චෛත්‍යය අසල නි‍ෙවසකට පැන වයසක මවකගේ ගෙල තිබූ රන් මාලය පැහැරගෙන ගියේ තමන් බවද සැකකරුවන් දෙදෙනෙකු පවසා තිබේ. ඒ අනුව ඔවුන් විසින් එම මාලය කල්මුණේ ප්‍රදේශයේ රත්තරන් බඩු අලෙවි හලකට රුපියල් 63,000කට විකුණා ඇති අතර එම ව්‍යාපාරිකයින් එම රත්තරන් උණුකර භාණ්ඩ සකස් කිරීමට සූදානම් කර තිබේ.
පසුව උණු කරන ලද රත්තරන්වලින් මාලයේ බරට රත්තරන් පොලිසිය විසින් අත්අඩංගුවට ගෙන තිබේ. මෙම රන්භාණ්ඩ එම රත්තරන් බඩු වෙළෙඳ සලට විකුණන අවස්තාවේ වෙළෙඳ සලේ හිමිකරු විසින් විකිණීමට පැමිණි පුද්ගලයින් දෙදෙනාගේ හැදුනුම්පත් පිටපත් රැගෙන ඇති අතර පොලිසිය විසින් අත්අඩංගුවට ගත් පුද්ගලයින් දෙදෙනා ඔවුන් දෙදෙනා බව තහවුරු කරගෙන තිබේ. පසුව මෙම සැකකරුවන් තිදෙනා අම්පාර මහේස්ත්‍රාත් අධිකරණයට ඉදිරිපත් කිරිමෙන් අනතුරුව අම්පාර මහේස්ත්‍රාත් නයෝමි වික්‍රමසිංහ මහත්මිය විසින් මෙම මස 30 වැනිදා දක්වා රක්ෂිත බන්ධනාගාරගතකොට තිබේ.
දිගාමඩුල්ල විශේෂ - වසන්ත චන්ද්‍රපාල